Borja Oubiña

Borja Oubiña Meléndez (nado o 17 de maio de 1982 en Vigo) é un futbolista que xoga habitualmente na posición de mediocentro.  Aínda que de moi neno xogou no Moledo CF, formouse no Gran Peña e nas categorías inferiores do Celta de Vigo, ascendeu ao primeiro equipo en 2003. Nas tempadas 2005-2006 e 2006-2007 foi un indiscutíbel titular.

Co descenso a Segunda División do equipo vigués en xuño de 2007 o xogador expresou o seu desexo de abandonar o clube. Despois de que varios equipos se interesasesn polo futbolista sen chegar a acordos co Celta, este cedeu a Oubiña ó Birmingham inglés o mesmo día que se pechaba o mercado de fichaxes (31 de agosto de 2007).

Debutou co Celta nun partido contra o Valencia na tempada 2003-2004 da man de Miguel Ángel Lotina. Esa tempada xogou doce partidos de liga e dous da Champions, o primeiro deles contra o Arsenal londiniense, no estadio de Highbury Park.

Logo do descenso do equipo, Oubiña liderou o conxunto como titular habitual, ata o ascenso. Ao ano seguinte, xa en primeira, foi determinante para que os celestes acadaran a sexta praza e se clasificasen para a Copa da UEFA. Destaca pola súa capacidade para recuperar balóns.

Internacional coa selección galega no partido contra Uruguai, no debú do conxunto galego dende a posguerra (29 de decembro de 2005). Internacional tamén coa selección española, onde debutou nun partido contra Liechtenstein (2 de setembro de 2006).

Licenciouse en Empresariais na Universidade de Vigo.